കാറ്റ്

ഉണങ്ങാൻ വച്ച കുടയോ,

കാറ്റു വന്നു വിളിക്കയിൽ

കുതിച്ചു ചാടിയോടുന്നു

കുതിരക്കുട്ടിയെന്നപോൽ!

ഇതിനേ,ജീവനില്ലെങ്കിൽ

ഓടുന്നെങ്ങെനെ,യിങ്ങനെ?

അഭിന്നം, പ്രാണനും കാറ്റും;

കാറ്റിന്റെ കഥ ജീവിതം!

ഒത്തുപോകൽ

സത്യവിശ്വാസമെന്നോരോ-

കൂട്ടരും ചൊൽവതൊക്കെയും,

ശൈശവം തൊട്ടു ബോധത്തിൽ

കൂടു കൂട്ടുന്ന പക്ഷികൾ!

സാദ്ധ്യമല്ലവ തൻശബ്ദ-

മൊട്ടും കേൾക്കാതിരിക്കുവാൻ!

ഒത്തു പോകട്ടവക്കൊപ്പ‌‌ -

മാടുവാനിഷ്ടമുള്ളവർ!

      ----*----

ദിനചതുരങ്ങൾ

ഇടംവലം

പേരു നന്നു്, മുഖം കൊള്ളാ-

മുള്ളിലാടോ, കുറുക്കനോ?

കുലം കാക്കും സഖാക്കൾ തൻ

കൃതി കണ്ടങ്ങു നിൽക്കയോ?

കരിക്കു പോൽ മുഖം കുത്തി

തുളച്ചാർക്കു കൊടുക്കുവാൻ?

വെട്ടി വെട്ടി നുറുക്കുന്ന-

താർക്കു സദ്യയൊരുക്കുവാൻ?

എവിടെപ്പിഴ? കാണാത്ത

കൊട്ടാരം കണ്ടു പോയതോ?

അവിടെപ്പൂത്ത രത്നങ്ങൾ

നിറങ്ങൾകെട്ടു ചീഞ്ഞതോ?

ചോരക്കണ്ണു തുറിക്കുന്നു

വീണുപോയൊരു  യൌവ്വനം!

ഇടത്തേയ്ക്കോ വലത്തേയ്ക്കോ

വളരുന്നതു വിപ്ലവം?

     ----*----

ദിനചതുരങ്ങൾ

മൃത്യുവേ തരണം ചെയ്യാ-

നെത്ര സേതു കടക്കണം?

ഒന്നുമാത്രം  സ്വയം വാക്കി-

നുള്ളിലേക്കു കടക്കുക!

അവിടെത്തിരി കത്തിച്ചുൾ

ചിത്രങ്ങൾ ചെന്നു കാണുക!

ഉദയം വരെയന്യൂനം

മൌനം തിന്നു വസിക്കുക!

           ----*----